ⵜⴰⵙⴷⵍⵉⵙⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ
ⴰⵙⵎⴰⵇⵇⵍ ⴼ ⵜⵙⴷⵍⵉⵙⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ
ⵎⵍⵍⵉⵖ ⵜⵍⵍⴰ ⵙⴳ ⵓⵙⴳⴳⵯⴰⵙ ⵏ 1970, ⵜⵉⵡⵉ ⵜⵙⵍⴷⵉⵙⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵅⵎⵎⴻⵎ ⴰⵅⴰⵜⴰⵔ, ⵙ ⵉⴱⴰⵢⵏⵓⵜⵏ ⵏ ⵜⵓⵙⵙⵏⴰ ⴷ ⵜⴻⵜⴳⴰⵔⵉⵏ ⵍⵍⵉ ⴳⵉⵙ ⵍⵍⴰⵏⵉⵏ, ⵍⵍⵉ ⵜⵜⵔⴰⵔⵏⵉⵏ ⵉ ⵎⴰⴷ ⵙⵖⴰⵡⵙⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ, ⵖⵎⴽ ⴰⵏⵏ ⵓⵍⴰ ⵉⵙⴰⵜⵉⵢⵏ ⵉⵎⵙⵙⵓⴳⵓⵔⵏ ⵏ ⵓⵙⵇⵇⵉⵎ ⴷ ⴽⵓⵍⵍⵓ ⵡⵉⴷⴰ ⵙⵜⴰⵡⵀⵎⵎⴰⵏⵉⵏ ⵙ ⵜⵡⵓⵔⵉⵡⵉⵏ ⵏⵏⵙ.
ⵉⵏⵏⴰ ⵉⴳⵍⵍⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵃⴰⵙⴰⵏ ⵡⵉⵙ ⵙⵉⵏ ⵜⴰⵎⵍⵍⴰ ⵏ ⵕⴱⴱⵉ ⴼ ⵉⵎⴰⵏ ⵏⵏⵙ ⵍⵍⵉⵖ ⵉⵙⵎⵍ ⵎⴰⵙⵙ ⵎⵓⵃⴰⵎⵎⴰⴷ ⵕⴰⵛⵉⴷ ⵉⴷⵔⵉⵙⵉ ⵍⵇⵉⵟⵓⵏⵉ ⴷ ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 11 ⴱⵕⴰⵢⵕ 1988, ⵉⵎⵙⴰⵙⴰⵏ ⴷ 22 ⵊⵓⵎⴰⴷⴰ 2 1408:
“....ⵉⵇⵇⴰⵏ ⴷ ⴼ ⵓⴱⵕⵍⴰⵎⴰⵏ ⴰⴷ ⵉⴳ ⵉⴱⴰⵢⵏⵓⵜⵏ ⵏ ⵜⴻⵜⴳⴰⵔⵉⵏ ⵉ ⵜⴰⵙⵓⵜⵉⵏ ⴷ ⵓⵛⴽⴰⵏⵉⵏ, ⵉⵇⵇⴰⵏⴷ ⴼ ⵓⴱⵕⵍⴰⵎⴰⵏ ⴰⴷ ⵉⴳ ⵜⴰⵙⴷⵍⵉⵙⵜ ⵍⵍⵉ ⵙ ⴰⴷ ⵜⵜⴰⵛⴽⴰⵏ ⵉⴽⴰⴱⴰⵕⵏ ⵙⴳ ⵜⴰⵙⴳⴳⵉⵡⵉⵏ ⵏ ⵓⵎⴰⴹⴰⵍ ⴷ ⵜⵓⵙⵙⵏⴰ ⵏ ⵡⴰⵎⵓⵏ ⴷ ⵓⵎⵣⵔⵓⵢ...”
ⴰⵙⵎⴰⵇⵇⵍ ⴰⵎⵣⵔⴰⵢ
ⵜⴻⵜⵜⵓⵙⴽⴰⵔ ⵜⵙⴷⵍⵉⵙⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵙⴳⴳⵯⴰⵙ ⵏ 1970, ⵜⴻⵜⵜⵓⵥⵍⴰⵢ ⴰⵙ ⵢⴰⵜ ⵜⴷⴰⵍⴰ ⵜⴰⵅⴰⵜⴰⵔⵜ ⵉⵎⵙⴰⵙⴰⵏ ⴷ ⵓⴷⵖⴰⵔ ⴳ ⵓⴳⵯⵏⵙ ⵏ ⵜⵎⵔⵙⵍⵜ. ⵜⴽⴽⴰ ⵜⵜ ⵏⵏ ⵜⵟⵟⴰⴼ ⴰⴼⵔⵉⵙ ⴰⵎⵖⵔⵉⴱⵉ ⴰⵇⴱⵓⵔ ⵙ ⵓⵚⴽⵓ ⵏⵏⵙ, ⴳ 1985 ⵜⴳⴰ ⵜⴰⵙⴷⵍⵉⵙⵜ ⵉⵙⵎⵓⵏⵏ ⵊⴰⵔ ⵜⵛⵓⵏⵉ ⵏ ⵓⵚⴽⵓ ⴰⵎⵖⵔⵉⴱⵉ ⴷ ⵎⴰⴷ ⵉⵙⵉⴳⴳⵉⵍ ⵓⵙⵡⵓⴷⴷⵓ ⴰⵜⵔⴰⵔ. ⴳ 2014, ⵉⵜⵜⵓⵥⵍⴰⵢ ⴰⵙ ⵓⵙⴰⵢⵔⵓⵔ ⵙⴳ ⵜⴰⵙⵓⵜ ⵜⴰⵎⴰⵢⵏⵓⵜ ⵉⵎⵙⴰⵙⴰⵏ ⴷ ⵓⵙⵡⵉⵔ ⵏ ⵜⵎⵔⵙⵍⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵛⵓⵏⵉ ⴷ ⵓⵎⴰⵡⴰ ⴷ ⵡⴰⵢⴷⴰ ⵏ ⵜⴻⵜⴳⴰⵔⵉⵏ ⵍⵍⵉ ⴳⵉⵙ ⵍⵍⴰⵏⵉⵏ.
ⵜⵉⵙⵎⵉⴳⴰⵍ
ⵜⵡⴰⵜⵜⵙ ⵜⵏⴰⴼⵜ ⵏ ⵜⵙⴷⵍⵉⵙⵜ ⴰⵙⴷⵓⵙ ⵏ ⵜⵙⵎⵉⴳⴰⵍ ⵜⵉⴷⵙⵜⴰⵔⵉⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵖ ⵉⵍⵍⴰ:
- ⴰⵙⵎⵓⵜⵜⴳ ⴷ ⵓⵙⵡⵓⴷⴷⵓ ⵏ ⵡⴰⵢⴷⴰ ⵏ ⵜⴻⵜⴳⴰⵔⵉⵏ ⵙ ⵎⵙⵓⵖⵜ ⵏ ⵉⴷⵍⵉⵙⵏ ⴷ ⵓⵣⵎⵎⴻⵎ ⵏ ⵉⵍⵜⴰⵖⵏ ⴰⴽⴷ ⵉⵖⵎⵉⵙⵏ ⴷ ⵜⵙⵖⵓⵏⵉⵏ;
- ⴰⵔⵣⵣⵓ ⵏ ⵜⴻⵜⴳⴰⵔⵉⵏ ⵜⵓⵛⵛⵉⵍⵉⵏ ⵉ ⵜⵡⵓⵔⵉ ⵏ ⵉⵎⵓⵔⴰ ⴷ ⵓⵙⵡⵓⴷⴷⵓ ⴷ ⵓⴱⵟⵟⵓ ⵏⵏⵙⵏⵜ;
- ⴰⴼⵔⴰⴳ ⴷ ⵓⵙⵙⵍⵙ ⴷ ⵓⵥⵍⴰⵢ ⵏ ⵡⴰⵢⴷⴰ ⵏ ⵜⴻⵜⴳⴰⵔⵉⵏ ⴳ ⵜⵙⴷⵍⵉⵙⵜ ⴷ ⵜⴼⴰⵜⵉⵜ ⵏⵏⵙ;
- ⴰⵙⵓⵊⴷ ⴷ ⵓⵙⵎⵏⵉⴷ ⵏ ⴽⵉⴳⴰⵏ ⵏ ⵜⵏⵓⴼⴰ ⵜⵉⵎⵓⵟⵟⵓⵏⵉⵏ ⵙ ⵓⵙⵎⴰⵢⵏⵓ ⵏ ⵜⵓⵎⴰⵢⵜ ⵏ ⵓⵙⵉⵜ ⴰⵍⵉⴽⵟⵕⵓⵏⵉ ⵏ ⵜⵙⴷⵍⵉⵙⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵉⵜ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ;
- ⴰⵕⵟⵟⴰⵍ ⵏ ⵉⴷⵍⵉⵙⵏ ⴷ ⵜⵙⵖⵓⵏⵉⵏ;
- ⴰⵙⵓⵊⴷ ⴷ ⵓⵙⵎⴰⵢⵏⵓ ⵏ ⵉⵙⴽⵜⵓⵔⵏ;
- ⴰⴷⴰⴼ ⵙ ⵜⵙⴰⵍⵉⵡⵉⵏ ⵏ ⵜⵎⵓⵛⴰ ⵏ ⵜⴻⵜⴳⴰⵔⵉⵏ.
ⵉⵎⵏⴼⴰ ⵙⴳ ⵜⵙⴷⵍⵉⵙⵜ
- ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵓⵔⴰ, ⵉⵙⴰⵜⵉⵢⵏ ⵉⵎⵙⵙⵓⴳⵓⵔⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ;
- ⵉⵙⵍⵎⴰⴷⵏ ⵉⵎⵙⴷⴰⵡⵏ ⴷ ⵉⵎⵣⵔⴰⵡⵏ ⵉⵎⵔⵣⵓⵜⵏ ⵉⵎⵖⵔⵉⴱⵉⵢⵏ ⴷ ⵉⴱⵕⵕⴰⵏⵉⵢⵏ.
ⴰⵢⴷⴰ ⵏ ⵜⴻⵜⴳⴰⵔⵉⵏ
ⴰⵢⵍⵍⵉ ⵉⵍⵍⴰⵏ
ⵢⵓⵎⴰ ⵡⴰⵢⴷⴰ ⵏ ⵜⵙⴷⵍⵉⵙⵜ:
- ⵓⴳⴳⴰⵔ ⵏ 10.000 ⵏ ⵓⵣⵡⵍ ⵏ ⵓⴷⵍⵉⵙ, ⵉⴷⵍⵉⵙⵏ ⵜⵜⵓⵥⵍⴰⵢⵏⵉⵏ ⵙ ⵓⵙⵏⴳⵉⴷⴷⵉ ⴰⵎⵔⴰⵡⴰⵏ ⴰⵎⴰⴹⵍⴰⵏ;
- ⴰⵣⵎⵎⴻⵎ ⴳ ⵓⴳⴳⴰⵔ ⵏ 200 ⵏ ⵜⵙⵖⵓⵏⵜ ⵜⴰⵎⴰⵙⵙⴰⵏⵜ ⵉⵥⵍⵉⵏ;
- ⵓⴳⴳⴰⵔ ⵏ 1200 ⵏ ⵉⴷⵍⵉⵙⵏ ⵉⵙⵓⵖⴰⵍ ⴰⵎ ⵉⵙⵓⵎⴰ ⴷ ⵉⵎⴰⵡⴰⵍⵏ...;
- ⵉⵖⵎⵉⵙⵏ ⵉⵡⵓⵙⵙⴰⵏⵏ ⴷ ⵉⵏⵎⵍⴰⵙⵙⵏ;
- ⵜⴰⵔⴰⴱⴱⵓⵜ ⵉⵙⵎⴷⵏ ⵏ ⵓⵖⵎⵉⵙ ⴰⵎⴰⴷⴷⵓⴷ, ⵙ ⵜⵓⵜⵍⴰⵢⵉⵏ ⵜⴰⵄⵕⴰⴱⵜ ⴷ ⵜⴼⵕⴰⵏⵚⵉⵚⵜ ⵙ ⵙⵏⴰⵜ ⵜⵓⵏⵖⵉⵍⵉⵏ (ⵜⴰⵥⵕⵉⴳⵜ ⵜⴰⵎⴰⵜⴰⵢⵜ ⴷ ⵉⵎⴷⴰⵡⴰⵍⵏ ⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ);
- ⵜⵉⵥⵕⵉⴳⵉⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ;
- ⵜⵉⵥⵕⵉⴳⵉⵏ ⵏ ⵛⴰ ⵏ ⵜⵎⵔⵙⵍⴰ ⵜⵉⴷⵙⵜⴰⵔⵉⵏ ⴷ ⵜⵎⴰⴷⴷⴰⵙⵉⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ.
ⵉⴳⵔ ⴰⵙⴳⵓⵎⴰⵏ
ⵢⵉⵡⵉ ⵜⵜ ⵡⴰⵢⴷⴰ ⵏ ⵜⴻⵜⴳⴰⵔⵉⵏ ⵉⴹⴼⵕⵏ ⵜⴰⵙⴷⵍⵉⵙⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵢⵉⴳⵔ ⵏ ⵜⵖⵓⵔⵉⵡⵉⵏ ⵜⵉⵣⵔⴼⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵙⵔⵜⴰⵏⵉⵏ, ⵖⵎⴽ ⴰⵏⵏ ⴷ ⵉⴳⵔⴰⵏ ⵏ ⵓⵎⵣⵔⵓⵢ ⴷ ⵜⵊⵢⵓⵖⵔⴰⴼⵉⵜ ⴷ ⵜⴼⵍⵙⴰⴼⵜ ⴷ ⵓⵙⴳⴷ ⴷ ⵎⴰⵕⵕⴰ ⵉⴳⵔⴰⵏ ⵣⴷⵉⵏⵉⵏ ⴷ ⵜⵡⵓⵔⵉ ⵏ ⵓⵙⵇⵇⵉⵎ.
ⵜⵓⵜⵍⴰⵢⵉⵏ
ⵢⵓⵎⴰ ⵡⴰⵢⴷⴰ ⵏ ⵜⴻⵜⴳⴰⵔⵉⵏ ⵉⴷⵍⵉⵙⵏ ⴷ ⵜⵙⵖⵓⵏⵉⵏ ⵙ ⵜⵓⵜⵍⴰⵢⵉⵏ ⵜⴰⵄⵕⴰⴱⵜ ⴷ ⵜⴼⵕⴰⵏⵚⵉⵚⵜ ⴷ ⵜⵓⵜⵍⴰⵢⵉⵏ ⵢⴰⴹⵏⵉⵏ ⵜⵓⴷⴷⵉⵔⵉⵏ.
ⵜⵉⵙⵔⴰⴳⵉⵏ ⵏ ⵜⵡⵓⵔⵉ
ⴰⵔ ⵜⵜⵏⵓⵕⵥⵓⵎ ⵜⵙⴷⵍⵉⵙⵜ ⴽⵓ ⴰⵙⵙ ⵙⴳ ⵜⵙⵔⴰⴳⵜ ⵜⵉⵙ 9.00 ⵏ ⵜⵉⴼⴰⵡⵜ ⴰⵔ ⵜⵙⵔⴰⴳⵜ ⵜⵉⵙ 16.00 ⵏ ⵜⴷⴳⴳⵯⴰⵜ, ⴰⴱⵍⴰ ⵓⵙⵙⴰⵏ ⵏ ⵓⵚⵉⴹⵢⴰⵚ ⴷ ⵓⵙⴰⵎⴰⵙ ⴷ ⵓⵙⵙⴰⵏ ⵏ ⵜⵉⴳⴳⴰ ⵜⵉⵎⴰⴷⴷⵓⴷⵉⵏ.
ⵜⵉⵏⵓⴼⴰ ⵜⵜⵓⵙⵎⵏⴰⴷⵏⵉⵏ
ⴰⵔ ⵜⴰⴽⴽⴰ ⵜⵙⴷⵍⵉⵙⵜ ⵉ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵓⵔⴰ ⵖⵎⴽ ⴰⵏⵏ ⵓⵍⴰ ⵉⵙⴰⵜⵉⵢⵏ ⵏ ⵓⵙⵇⵇⵉⵎ ⵜⵉⵏⵓⴼⴰ ⵜⵉⵎⵏⵏⴰⵡⵉⵏ ⵥⵍⵉⵏⵉⵏ ⴰⵎ:
- ⵜⴰⵏⴰⴼⵜ ⵏ ⵓⵔⵣⵣⵓ ⴷ ⵓⵙⵡⴰⵍⴰ ⴷ ⵜⵡⵉⵙⵉ;
- ⵜⴰⵏⴰⴼⵜ ⵏ ⵓⵙⵙⵏ ⴷ ⵉⵥⵕⵉ ⵏ ⵡⴰⵢⴷⴰ ⵏ ⵜⴻⵜⴳⴰⵔⵉⵏ;
- ⵜⴰⵏⴰⴼⵜ ⵏ ⵓⵕⵟⵟⴰⵍ ⵙ ⴱⵕⵕⴰ;
- ⵜⵉⵏⵓⴼⴰ ⵜⵉⵜⴳⴰⵔⵉⵏ ⵜⵉⵎⵏⵏⴰⵡⵉⵏ (ⵜⴰⵙⵖⵓⵏⵜ ⵏ ⵜⵙⴷⵍⵉⵙⵜ, ⴰⵙⴽⵜⵓⵔ ⵏ ⵉⵙⴽⵜⵓⵔⵏ, ⵜⴰⵙⵖⵓⵏⵜ ⵏ ⵜⵉⴹⴰⴼ ⵜⴰⵣⵔⴼⴰⵏⵜ ⴷ ⵜⵎⴰⵙⵙⴰⵏⵜ, ⴰⵙⴷⴰⵡ ⴰⵙⴳⵓⵎⴰⵏ, ⵉⵙⴽⵜⵓⵔⵏ ⵥⵍⵉⵏⵉⵏ).
ⵜⵉⵏⵓⴼⴰ ⵜⵉⵎⵓⵟⵟⵓⵏⵉⵏ
ⵜⵟⵟⴰⴼ ⵜⵙⴷⵍⵉⵙⵜ ⴰⵙⵉⵜ ⴰⵍⵉⴽⵟⵕⵓⵏⵉ ⴰⴳⵯⵏⵙⴰⵏ, ⴰⵔ ⵜⴰⴽⴽⴰ ⵜⵉⵏⵓⴼⴰ ⵜⵉⵎⵓⵟⵟⵓⵏⵉⵏ ⴷ ⵡⴰⴷⴰⴼ ⵙ ⵡⴰⵢⴷⴰ ⵏ ⵜⴻⵜⴳⴰⵔⵉⵏ ⵍⵍⴰⵏⵉⵏ ⴳ ⵜⵙⴷⵍⵉⵙⵜ ⵙ ⵓⵙⴽⵜⵓⵔ ⴰⵍⵉⴽⵟⵕⵓⵏⵉ ⵏ ⵡⴰⵢⴷⴰ ⵏ ⵜⴻⵜⴳⴰⵔⵉⵏ.
ⴰⵔ ⵜⴰⴽⴽⴰ ⵜⵙⴷⵍⵉⵙⵜ ⵜⴰⵏⴰⴼⵜ ⵏ ⵡⴰⴷⴰⴼ ⵙ ⵜⵔⴰⴱⴱⵓⵜ ⵉⴳⴳⵓⵜⵏ ⵏ ⵜⵙⴰⵍⵉⵡⵉⵏ ⵏ ⵜⵎⵓⵛⴰ ⵥⵍⵉⵏⵉ ⴳ ⵉⴳⵔⴰⵏ ⴳⴳⵓⵜⵏⵉⵏ, ⴰⵎⴰ ⵜⵉⵙⴰⵍⵉⵡⵉⵏ ⵏ ⵜⵎⵓⵛⴰ ⵜⵉⵣⵔⴼⴰⵏⵉⵏ ⴷ ⵜⵉⴷⴰ ⵥⵍⵉⵏⵉⵏ ⵙ ⵓⵎⴰⵏⴰⵔ ⴰⵣⵣⵔⴰⴼ ⴰⵎⵖⵔⵉⴱⵉ, ⴷ ⵜⵙⵉⵍⴰ ⵏ ⵜⵖⵓⵔⵉⵡⵉⵏ ⵜⵉⵙⵜⵔⴰⵜⵉⵊⵉⵢⵉⵏ ⴷ ⵜⵖⴰⵡⵙⵉⵡⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵉⵢⵢⴰⴹ. ⵥⴹⴰⵕⵏ ⵉⵎⵍⵜⴰⵖⵏ ⴳ ⵜⵙⴷⵍⵉⵙⵜ ⴰⴷ ⵥⵕⵉⵏ ⵜⵓⴳⵜ ⵏ ⵉⴷⵍⵉⵙⵏ ⵉⵎⵓⵟⵟⵓⵏⵏ ⵜⵜⵓⵙⵜⴰⵢⵏⵉⵏ ⵙⴳ ⵓⴳⴳⴰⵔ ⵏ 400 ⵏ ⵓⵎⵥⵕⵉⴳ ⵙ ⵜⵓⵜⵍⴰⵢⵜ ⵜⴰⴼⵕⴰⵏⵚⵉⵚⵜ ⴷ ⵜⵓⵜⵍⴰⵢⵉⵏ ⵢⴰⴹⵏⵉⵏ ⵏ ⴱⵕⵕⴰ.