ⵉⵙⴰⵡⵍ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵓⴳⵣⵣⵓⵎ ⵏⵏⵙ ⵡⵉⵙ ⴽⴽⵓⵥ ⴼ ⵜⵉⵍⴰⵍⵜ ⵏ ⵓⵙⴰⴳⴳⵯ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵙ ⵖⵎⴽ ⴰⴷ :
ⴰⵎⵏⵏⵉ 107
ⵥⴹⴰⵕⵏⵜ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴰⴷ ⵙⵎⵉⴳⵍⵏⵜ, ⵙ ⵜⵓⵜⵔⴰ ⵏ ⵓⵏⵙⵙⵉⵅⴼ ⵏⵏⵙⵏⵜ ⴷⴼⴼⵉⵔ ⵏ ⵓⵎⵛⴰⵛⴽⴰ ⵏ ⵓⵙⵉⵔⴰ ⵏ ⵜⵙⵇⵇⵉⵎⵜ ⵏⵖ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏⵖ ⴰⵏⵙⵙⵉⵅⴼ ⵏ ⵜⴳⵔⵓⵎⵎⴰ ⵜⴰⴱⵕⵍⴰⵎⴰⵏⵉⵜ ⵏⵖ ⴰⴼⴽⵕⴰⴹ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ, ⵙⵉⵏ ⵉⴳⵎⴰⵎⵏ ⵏⵖ ⵓⴳⴳⴰⵔ ⵖ ⵉⴳⵎⴰⵎⵏ ⵏⵏⵙⵏⵜ, ⵙ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵜⴰⵎⵙⵉⴽⵓⴷⵜ ⴼ ⵜⴼⴰⴷⵉⵡⵉⵏ ⴷ ⵜⵎⵙⵓⵜⴰⵍ ⵏ ⵜⵙⵏⵙⵉ ⵏ ⵓⴹⵕⵉⵚ ⴰⵣⵣⵔⴰⴼ ⴰⵎⵏⵜⴰⵢ, ⵏⵖ ⵢⴰⵏ ⵉⵎⵔⵙⵉ ⵉⵀⵎⵎⴰⵏ ⴰⵎⵓⵏ, ⵏⵖ ⵉⵣⴷⵉ ⴷ ⵢⴰⵜ ⵖ ⵜⵉⵍⴰⵍⵉⵏ ⵏ ⵜⵏⴱⴰⴹⵜ ⴷ ⵜⵎⵙⵙⵓⴳⵓⵔⵉⵏ ⴷ ⵜⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ ⵙ ⵓⵎⵛⴰⵛⴽⴰ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ.
ⵉⵅⴰⵚⵚ ⴰⴷ ⵉⴳ ⵉⵎⵔⵙⵉ ⵏ ⵓⵙⴰⴳⴳⵯ ⵖ ⵉⴳⵔⴰⵏ ⴷ ⵜⵎⵔⵙⴰⵍ ⴽⵛⵎⵏⵉⵏ ⵖ ⵜⵎⵥⵍⴰⵢ ⵏ ⵜⵙⵇⵇⵉⵎⵜ ⵜⴰⵎⵏⵜⴰⵢⵜ.
ⴰⵔ ⵉⵙⵔⵓⵙ ⵓⵙⵉⵔⴰ ⵏ ⵓⵙⵇⵇⵉⵎ ⵢⴰⵜ ⵜⵍⴳⴰⵎⵜ ⵜⴰⴳⵯⵏⵙⴰⵏⵜ ⵉⵙⵏⵎⴰⵍⴰⵏ ⵜⵉⵙⵎⵉⴳⴰⵍ ⵏ ⵓⵙⴰⴳⴳⵯ.
ⴰⵔ ⵉⵜⵜⴰⵣⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵎⵏⵜⴰⵢⵜ ⵜⴰⴱⵔⴰⵜ ⵏ ⵜⵓⵜⵔⴰ ⵏ ⵜⵓⵔⴰⵢⵜ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ, ⵉⵙⵎⵓⵏ ⴷⵉⴷⵙ ⴰⵙⵖⵍⴼ ⵙ ⵜⵙⵎⵉⴳⵍⵜ ⵉⴳⴰⵏ ⵉⵎⵔⵙⵉ ⵏ ⵓⵙⴰⴳⴳⵯ ⴷ ⵓⵎⵙⵇⵙⵉ ⵉⵎⵎⴰⵍⴰⵏ ⴰⵙⵖⴰⵡⵙⴰ ⵙⵔⵙ ⴷ ⵉⵡⵜⵜⴰ ⵏⵏⵙ ⴷ ⵡⴰⵡⵜⵜⴰⵙ ⵏⵏⵙ ⴷ ⴽⵓ ⵉⵙⵇⵙⵉⵜⵏ ⴷ ⵜⵎⵓⴽⵔⵉⵙⵉⵏ ⵍⵍⵉ ⴷ ⵜⵇⵇⴰⵏ ⵜⵎⵔⴰⵔⵓⵜ, ⴷ ⵓⴷⵖⴰⵔ ⴷ ⵓⵣⵎⵣ ⵖ ⵔⴰⴷ ⵜⵜⵓⵙⴽⵉⵔ ⴷ ⵓⵙⵏⵓⵎⵍ ⵏ ⵜⵎⵓⵣⴰⵢⵉⵏ ⴷ ⵉⵎⴰⵜⵜⵉⵡⵏ ⵓⵛⵛⵉⵍⵏ ⵉ ⵜⵎⵙⴽⵔⵜ ⵏ ⵜⵙⵎⵉⴳⵍⵜ.
ⴰⵎⵏⵏⵉ 108
ⴰⵔ ⵉⵙⵔⵓⵙ ⵓⵙⵉⵔⴰ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⴰⵏⵛⴽ ⵏ ⵉⵎⵓⵔⴰ ⵉⵜⵜⵓⵙⵎⴰⴳⴰⵍⵏ ⵙ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵍⵍⵉ ⴷ ⵉⵇⵇⴰⵏ ⴰⴷ ⵓⵔ ⵢⵉⴳⵓⵜ ⴼ ⴽⵕⴰⴹ ⴷ ⵎⵔⴰⵡ (13) ⵏ ⵓⴳⵎⴰⵎ ⴷ ⴰⴷ ⵓⵔ ⵉⴷⵔⵓⵙ ⴼ ⵙⵉⵏ (2) ⵉⴳⵎⴰⵎⵏ.
ⵥⴹⴰⵕⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴰⴷ ⵙⵖⵍⴼⵏⵜ ⴰⴳⵏⵙⴰⵙ ⵏⵏⵙⵏⵜ ⵏⵖ ⵉⴳⵏⵙⴰⵙⵏ ⵓⵔ ⵍⵍⵉⵏⵉⵏ ⵖ ⵜⵙⵇⵇⵉⵎⵜ ⵉⵙⴽⵔⵏ ⵜⴰⵙⵎⵉⴳⵍⵜ ⵏ ⵓⵙⴰⴳⴳⵯ.
ⵉⵇⵇⴰⵏ ⴷ ⴰⴷ ⵜⵉⵍⵉ ⵜⵎⵓⵣⴰⵢⵜ ⴷ ⵜⵥⵍⴰⵢⵜ ⵖ ⵓⵙⵎⵍ ⵏ ⵉⴳⵎⴰⵎⵏ ⵏ ⵜⵙⵎⵉⴳⵍⵜ ⵏ ⵓⵙⴰⴳⴳⵯ.
ⴰⵔ ⵙⵎⴰⵍⴰⵏ ⵉⴳⵎⴰⵎⵏ ⵏ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⴰⵏⵙⵙⵉⵅⴼ ⴷ ⵓⵎⵏⵇⵇⴰⵙ, ⵢⴰⵏ ⴳⵉⵙⵏ ⵙⴳ ⵜⵓⵣⵍⵜ ⵙ ⵓⵎⵙⴰⵙⴰ ⴷ ⵓⵍⵓⴳⵏ ⵏ ⵓⴳⵏⵙⴻⵙ ⴰⵙⵖⵍⴰⵏ.ⴰⵔ ⵙⵎⴰⵍⴰⵏ ⵓⵍⴰ ⴰⵎⴰⵔⵉ ⵏ ⵓⵏⵙⵙⵉⵅⴼ ⴷ ⵡⵉⵏ ⴰⵎⵏⵇⵇⴰⵙ.
ⴰⵔ ⵜⵜⵉⵍⵉ ⵜⵣⵡⵉⵔⵉ ⵖ ⵓⵙⵜⴰⵢ ⵏ ⵓⵏⵙⵙⵉⵅⴼ ⴷ ⵓⵎⵏⵇⵇⴰⵙ ⴷⴰⵔ ⵡⴰⵍⵍⵉ ⵉⵜⵜⵔⵏ ⵜⴰⵙⵎⵉⴳⵍⵜ ⵙ ⵓⵎⵛⴰⵛⴽⴰ ⴷ ⵓⵎⵏⵣⴰⵢ ⵏ ⵜⵡⴰⵍⴰ.
ⴰⵔ ⵜⵜⵓⵎⵖⵓⵏⵏ ⵉⴳⵎⴰⵎⵏ ⵏ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵖ ⵓⵙⴽⵔ ⵏ ⵜⵡⵓⵔⵉ ⵏⵏⵙ ⵙ ⵜⴼⴰⴷⵉⵡⵉⵏ ⵍⵍⴰⵏⵉⵏ ⵖ ⵓⵙⵖⵍⴼ ⵏ ⵜⵙⵎⵉⴳⵍⵜ ⵉⵜⵜⵓⵚⵕⴰⴼⵏ ⵉ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ.
ⴰⵔ ⵙⵓⵊⴰⴷⵏ ⵉⴳⵎⴰⵎⵏ ⵏ ⵜⵙⵎⵉⴳⵍⵜ ⴰⵏⵇⵇⵉⵙ ⴼ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵍⵍⵉ ⵙⴽⵔⵏ ⴰⵣⵏⵏ ⵜ ⵉ ⵓⵙⵉⵔⴰ ⵏ ⵜⵙⵇⵇⵉⵎⵜ.
ⴰⵎⵏⵏⵉ 109
ⴰⵔ ⵜⵜⵉⵍⵉ ⵜⵖⵔⵉ ⵏ ⵉⵏⵇⵇⵉⵙⵏ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⵜⵉⵎⵙⵉⴽⵓⴷⵉⵏ ⵙ ⵜⴱⵔⵉⴷⵜ ⴰⴷ :
- ⴰⵔ ⵉⵜⵜⵓⵚⵕⵉⴼ ⵓⵏⵇⵇⵉⵙ ⵏ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵉ ⵓⵙⵉⵔⴰ ⵏ ⵓⵙⵇⵇⵉⵎ ⵖ ⵜⵉⵣⵉ ⵖ ⵉⵜⵜⵓⵚⵕⴰⴼ ⵉ ⵜⵙⵇⵇⵉⵎⵜ ⵜⴰⵎⵏⵜⴰⵢⵜ, ⵖ ⵓⵣⵎⵣ ⵏⵏ ⵓⵔ ⵉⵣⵔⵉⵏ ⴽⵕⴰⴹ ⵡⴰⴳⵏⴰⵔⵏ ⵖ ⵜⵍⵍⴰ ⵜⵎⵙⴽⵔⵜ ⵜⴰⵎⵣⵡⴰⵔⵓⵜ;
- ⴰⵔ ⵉⵙⵎⵏⵉⴷ ⴰⵎⵏⵇⵇⴰⵙ ⴰⵏⵇⵇⵉⵙ ⴷⴰⵜ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵉ ⵓⵎⴹⴰⴽⴰⵕ ⵏⵏⵙ;
- ⴰⵔ ⵜⵜⵃⴰⴹⴰⵕ ⵜⵏⴱⴰⴹⵜ ⵖ ⵓⵎⴹⴰⴽⴰⵕ ⵜⴰⵡⵙ ⴳⵉⵙ;
- ⴰⵔ ⵜⵙⵓⵊⴰⴷ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵜⴰⴳⴹⵡⵉⵜ ⴼ ⵓⵎⴹⴰⴽⴰⵕ ⴰⵎⴰⵜⴰⵢ ⵏ ⵓⵏⵇⵇⵉⵙ ⵏ ⵜⵙⵎⵉⴳⵍⵜ ⵏ ⵓⵙⴰⴳⴳⵯ;
- ⴰⵔ ⵜⵜⵓⵚⵕⵉⴼ ⵜⴳⴹⵡⵉⵜ ⵏ ⵓⵎⴹⴰⴽⴰⵕ ⵉⵎⵓⵏⵏ ⴷ ⵓⵏⵇⵇⵉⵙ ⵏ ⵜⵙⵎⵉⴳⵍⵜ ⵏ ⵓⵙⴰⴳⴳⵯ ⵉ ⵓⵙⵉⵔⴰ ⵍⵍⵉ ⵜⵜ ⵢⴰⵇⵔⴰⵏ ⵃⵎⴰ ⴰⴷ ⵉⴼⴼⵖ ⵙ ⵜⵖⵜⴰⵙⵜ ⵏ ⵓⵙⵖⵉⵡⵙ ⵏⵏⵙ ⵖ ⵜⵖⵉⵎⵉⵜ ⵜⴰⵎⴰⵜⴰⵢⵜ ⵏⵖ ⵓⵀⵓ;
- ⵉⵖ ⵜⵜⵓⵚⵔⴰⴼ ⵜⴳⴹⵡⵉⵜ ⵉⵎⵓⵏⵏ ⴷ ⵓⵏⵇⵇⵉⵙ ⵉ ⵜⵖⵉⵎⵉⵜ ⵜⴰⵎⴰⵜⴰⵢⵜ ⵃⵎⴰ ⴰⴷ ⵢⵉⵍⵉ ⵓⵎⴹⴰⴽⴰⵕ ⵏⵏⵙⵏ, ⵜⵣⴹⴰⵕ ⵜⵏⴱⴰⴹⵜ ⴰⴷ ⵜⵃⴰⴹⵕ ⵖ ⵜⵖⵉⵎⵉⵜ ⵃⵎⴰ ⴰⴷ ⵜⵔⴰⵔ ⴼ ⵉⵙⵇⵙⵉⵜⵏ ⵣⴷⵉⵏⵉⵏ ⴷ ⵜⵓⵎⴰⵢⵉⵏ ⵏⵏⵙⵏ.
*****
ⵜⵉⵙⵎⵉⴳⴰⵍ ⵏ ⵓⵙⴰⴳⴳⵯ ⵖ ⵜⵡⴰⵍⴰ ⵜⴰⵣⵣⵔⴰⴼⵜ (2016-2021) :
ⵜⵉⵙⵎⵉⴳⴰⵍ ⵏ ⵓⵙⴰⴳⴳⵯ ⵙ ⵜⵙⵇⵇⵉⵎⵜ :
*****