ⴰⵎⴹⴰⴽⴰⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵓⵜⴳ ⵏⵏⵙⵏⵜ

ⵙ ⵓⵎⵏⵏⵉ 101 ⵏ ⵓⴷⵓⵙⵜⵓⵔ ⵏ 2011, ⴰⵔ ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵎⴰⵖⵓⵏⵜ ⵜⴰⴼⵔⴽⴰⵏⵜ ⵏ ⵜⵡⵓⵔⵉ ⵏ ⵜⵏⴱⴰⴹⵜ, ⵙ ⵜⵙⵏⵜⴰⵢⵜ ⵏⵏⵙ, ⵏⵖ ⵙ ⵜⵓⵜⵔⴰ ⵏ ⵓⴼⴽⵕⴰⴹ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵏⵖ ⵙ ⵜⵓⴳⵜ ⵏ ⵉⴳⵎⴰⵎⵏ  ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ. ⵖⵎⴽ ⵍⵍⵉ ⵉⵥⵍⴰⵢ ⵓⴱⵕⵍⴰⵎⴰⵏ ⵜⵉⵖⵉⵎⵉⵜ ⵜⴰⵙⴳⵯⵙⴰⵏⵜ  ⵉ ⵓⵎⴹⴰⴽⴰⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵓⵜⴳ ⵏⵏⵙⵏⵜ.

ⵙ ⵓⵎⵏⵏⵉ 287 ⵏ ⵓⴳⵣⵣⵓⵎ ⵡⵉⵙ ⵙⴰ ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵖ ⵉⵜⵜⵓⴱⴷⴰⵔ ⵓⵎⴹⴰⴽⴰⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵙ ⵓⵎⵙⴰⵙⴰ ⴷ ⵓⵎⵏⵏⵉ 70 ⵏ ⵓⴷⵓⵙⵜⵓⵔ, ⴰⵔ ⵉⵙⴽⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴰⵔ ⵉⵥⵍⴰⵢ ⵢⴰⵜ ⵜⵖⵉⵎⵉⵜ ⵜⴰⵙⴳⵯⵙⴰⵏⵜ ⵉ ⵓⵎⴹⴰⴽⴰⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵍⵍⵉ ⵎⵓ ⵉⵙⴽⵔ ⴰⵙⵓⵜⴳ ⵙ ⵓⵎⵙⴰⵙⴰ ⴷ ⵜⴼⴰⴷⵉⵡⵉⵏ ⴷ ⵜⴱⵔⵉⴷⵉⵏ ⵥⵍⵉⵏⵉⵏ ⵙ ⵉⴳⵔ ⴰⴷ.

ⵢⵓⵛⴽⴰ ⴷ ⵓⵍⴰ ⵖ ⵓⵎⵏⵏⵉ 288 ⵎⴰⵙ ⵉⵡⴰⵜⵜⵙ ⵓⵙⵓⵜⴳ ⵍⵍⵉ ⵉⵙⴽⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⴽⵔ ⵏ ⵉⵔⵣⵣⵓⵜⵏ ⴷ ⵉⵙⴼⵙⵉⵜⵏ ⵙⵇⵇⵉⵇⵏⵉⵏ ⵃⵎⴰ ⴰⴷ ⵜⵜⵓⵙⵉⵏⵏⵜ ⵜⵢⴰⴼⵓⵜⵉⵏ ⵏ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ, ⴷ ⵓⵙⵖⵍ ⵏ ⵉⴷⵔⵉⵣⵏ ⵏⵏⵙⵏ ⴼ ⵜⴷⵓⵍⴰ ⵜⵉⵎⵏⵜⴰⵢ ⴷ ⵡⴰⵎⵓⵏ, ⵖⵎⴽ ⵍⵍⵉ ⵉⵡⴰⵜⵜⵙ ⴰⴷ ⵉⵜⵜⵓⵙⵙⵉⵏ ⵓⵙⵡⵉⵔ ⵏ ⵜⵎⵙⴽⵔⵜ ⵉⵍⵍⴰⵏ ⵙ ⵓⵙⵖⵍ ⵏ ⵉⵡⵜⵜⴰⵙⵏ ⵜⵜⵔⵙⵏⵉⵏ, ⴷ ⵓⵙⵔⵓⵙ ⵏ ⵉⵎⵏⵜⵉⵍⵏ ⵉⵡⵙⵏⵉⵏ ⴰⴷ ⵜⵜⵓⵙⴽⵉⵔⵏ ⵉⵡⵜⵜⴰⵙⵏ ⴰⵏⵏ. ⵃⵎⴰ ⴰⴷ ⵜⵉⵍⵉ ⵜⵥⵕⵉⴳⵜ ⵏ ⵉⵙⵖⵍⴰⴼ ⴷ ⵓⵙⵎⵏⵉⴷ ⵏ ⵜⵙⵓⵎⴰⵔ ⴼ ⵉⵙⵖⵓⴷⵓⵜⵏ ⵍⵍⵉ ⵔⴰⴷ ⵢⵉⵍⵉ ⵖ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴳⴰⵏⵉⵏ ⵉⵎⵔⵙⵉ ⵏ ⵓⵙⵓⵜⴳ.

ⵉⵙⴰⵡⵍ ⵓⵎⵏⵏⵉ 289 ⴼ ⵓⵙⵓⵊⴷ ⵏ ⵜⵖⵉⵎⵉⵜ ⵜⴰⵙⴳⵯⵙⴰⵏⵜ ⵏ ⵓⵎⴹⴰⴽⴰⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴰⵔ ⵉⵙⵔⵓⵙ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵔⵜⵉⵜ ⵜⴰⴳⴷⵓⴷⴰⵏⵜ ⵉⴳⴰⵏ ⵜⴰⵙⵓⵎⵔⵜ ⵏ ⵓⵙⵓⵜⴳ ⵙ ⴰⵢⵍⵍⵉ ⵏⵏⴰⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵖ ⵜⵣⵡⵉⵔⵉ ⵏ ⵓⵙⴳⴳⵯⴰⵙ ⴰⵣⵣⵔⴰⴼ, ⵉⵥⴹⴰⵕ ⵓⵍⴰ ⴰⴷ ⵉⵙⴽⵔ ⵢⴰⵏ ⵓⵙⵖⵉⵡⵙ ⵉ ⵎⵏⵏⴰⵡ ⵉⵙⴳⴳⵯⴰⵙⵏ. ⴰⵔ ⵜⵜⵉⵍⵉⵏⵜ ⵜⵙⵓⵎⴰⵔ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵎⵓⵏⵏⵜ ⴷ ⵢⴰⵜ ⵜⵖⵔⵉ ⵜⴰⵎⵣⵡⴰⵔⵓⵜ ⵉⵎⵎⴰⵍⴰⵏ ⵚⴰⵃⴰ ⴷ ⵜⵎⵓⴽⵔⵉⵙⵉⵏ ⵜⵉⵅⴰⵜⴰⵔⵉⵏ ⵍⵍⵉ ⴷ ⵜⵉⵡⵉ ⵜⵙⵔⵜⵉⵜ ⵏⵖ ⴰⵖⴰⵡⴰⵙ ⵎⵓ ⵔⴰⴷ ⵉⵜⵜⵓⵙⵇⴽⵉⵔ ⵓⵙⵓⵜⴳ.

ⵢⵉⵡⵉ ⴷ ⵓⵎⵏⵏⵉ 290 ⵎⴰⵙ ⴰ ⵉⵙⵜⴰⵢ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵎⵔⵙⵉ ⵏ ⵓⵙⵓⵜⴳ ⵉⵖ ⴷ ⵎⵛⴰⵛⴽⴰⵏ ⵉⵎⵔⵙⵉⵡⵏ ⵎⵓ ⵔⴰⴷ ⵉⵜⵜⵓⵙⴽⵉⵔ ⵓⵙⵓⵜⴳ ⴷ ⵉⵙⴱⴷⴰⴷⵏ ⵉⵙⵔⵜⴰⵏⵏ ⴷ ⵉⵜⵉⵇⵏⵉⵢⵏ ⴷ ⵡⵉⵏ ⵓⵎⵏⴰⴹ.  ⴰⵔ ⵉⵙⵓⵊⴰⴷ ⵓⵙⵉⵔⴰ ⵏ ⵓⵙⵇⵇⵉⵎ ⴰⵙⵖⵍⴼ ⵉ ⵓⵙⵓⵜⴳ ⵏ ⵜⵙⵔⵜⵉⵜ ⵏⵖ ⴰⵖⴰⵡⴰⵙ ⴰⴳⴷⵓⴷⴰⵏ ⵉⵍⵍⴰⵏ, ⴳⵉⵙ ⵉⵎⵏⴰⴷⵏ ⵏ ⵓⵙⵓⵜⴳ ⴷ ⵉⵎⵏⵜⵉⵍⵏ ⵏⵏⵙ ⴷ ⵉⵡⵜⵜⴰⵙⵏ ⵏⵏⵙ ⴷ ⵓⴷⵖⴰⵔ ⵏⵏⵙ ⴷ ⵡⴰⵏⴰⵡ ⵏⵏⵙ ⴷ ⵉⵙⵇⵙⵉⵜⵏ ⵏⵏⵙ ⵉⴷⵙⵍⴰⵏⵏ ⵏ ⵓⵙⵓⵜⴳ. ⴰⵔ ⵢⴰⵇⵔⴰ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⵢⵉⵍⵉ ⵓⵙⴽⵔ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵍⵍⵉ ⵔⴰⴷ ⵉⴹⴼⵕ ⴰⵙⴽⵔ ⵏ ⵓⵙⵓⵜⴳ ⵏ ⵉⵎⵔⵙⵉ ⵍⵍⵉ ⵉⵙⵔⵙ ⵙ ⵓⵎⵙⴰⵙ ⴷ ⵓⵙⵖⵍⴼ ⵍⵍⵉ ⵉⵙⵓⵊⴰⴷ.

ⵢⵉⵡⵉ ⴷ ⵓⵎⵏⵏⵉ 291 ⵎⴰⵙ ⴰ ⵉⵜⵜⵉⵍⵉ ⵖ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵜⴰⵎⵙⵉⴽⵓⴷⵜ ⵢⴰⵏ ⵓⴳⵏⵙⴰⵙ ⵏ ⴽⵓ ⵜⴰⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⴷ ⵜⴳⵔⵓⵎⵎⴰ ⵜⴰⴱⵕⵍⴰⵎⴰⵏⵉ, ⴰⵔ ⴳⵉⵙⵏ ⵉⵜⵜⵉⵍⵉ ⵓⵏⵙⵙⵉⵅⴼ ⴷ ⵓⵎⵏⴰⵇⵇⴰⵙ ⵢⴰⵏ ⴳⵉⵙⵏ ⵙⴳ ⵜⵓⵣⵍⵜ. ⵙ ⴰⵢⵍⵍⵉ ⵉⵍⵍⴰⵏ ⵖ ⵓⵙⵖⵍⴼ ⵍⵍⵉ ⵉⵙⵓⵊⴰⴷ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵔ ⵜⵙⴽⴰⵔ ⵜⵔⴰⴱⴱⵓⵜ ⵜⵉⵡⵓⵔⵉⵡⵉⵏ ⴰⴷ: ⵜⵉⵔⵔⴰ ⵏ ⵉⵔⵎⵎⵓⵙⵏ ⴷ ⵉⴼⵔⴷⴰⵙ ⵉⵙⴰⵖⵓⵍⵏ ⵏ ⵓⵙⵓⵜⴳ ⵏ ⵉⵎⵔⵙⵉ, ⴰⵙⵎⵓⵏ ⵏ ⵉⴼⵔⴷⴰⵙ ⵉⵎⵣⵡⵓⵔⴰ, ⴰⵕⵥⵓⵎ ⵏ ⵉⵔⵣⵣⵓⵜⵏ ⵜⵜⵔⵙⵏⵉⵏ, ⴰⵙⵖⵣⵏ ⵏ ⵜⵎⵔⴳⴰⵍ ⵏ ⵉⵔⵣⵣⵓⵜⵏ ⴷ ⵜⵣⵔⴰⵡⵉⵏ, ⴰⵙⵔⵓⵙ ⵏ ⵉⵙⵖⵍⴰⴼ ⴷ ⵜⵙⵓⵎⴰⵔ, ⵜⵉⵔⵔⴰ ⵏ ⵓⵏⵇⵇⵉⵙ ⵏ ⵓⵙⵓⵜⴳ.

ⵙ ⵓⵎⵏⴰⵡⴰⵢ ⴷ ⵜⵡⵓⵔⵉ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ, ⵎⴽ ⵉⵍⵍⴰⵏ ⵖ ⵓⵎⵏⵏⵉ 292,  ⵉⵥⴹⴰⵕ ⵓⵏⵙⵙⵉⵅⴼ ⵏ ⵓⵙⵉⵔⴰ ⵏ ⵓⵙⵇⵇⵉⵎ, ⵙ ⵜⵖⵜⴰⵙⵜ ⵏ ⵓⵙⵉⵔⴰ, ⴰⴷ ⵢⴰⵣⵏ ⵉⵖ ⵉⵔⴰ ⵏⵖ ⵙ ⵜⵓⵜⵔⴰ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵓⵜⴳ, ⵢⴰⵜ ⵜⵓⵜⵔⴰ ⵉ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ ⵏⵖ ⵉ ⴽⵔⴰ ⵖ ⵜⴳⵔⴰⵡⵉⵏ ⵏ ⵓⵏⴱⴰⴹ ⴷ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ ⵉⵖ ⵉⵍⵍⴰ ⵓⵙⵖⴰⵡⵙⴰ, ⵉ ⵓⵙⵎⵏⵉⴷ ⵏ ⵜⴰⵏⵏⴰⵢⵜ ⵏⵖ ⴰⵙⵓⵊⴷ ⵏ ⵜⵣⵔⴰⵡⵜ ⵏⵖ ⴰⵔⵣⵣⵓ ⴼ ⵓⵖⴰⵡⴰⵙ ⴰⴳⴷⵓⴷⴰⵏ ⵉⴳⴰⵏ ⵉⵎⵔⵙⵉ ⵏ ⵓⵙⵓⵜⴳ. ⴰⵔ ⵜⵜⵓⵚⵕⵉⴼⵏ ⵉⵏⵇⵇⵉⵙⵏ ⵣⴷⵉⵏⵉⵏ ⴷ ⵜⴰⵏⵏⴰⵢⵉⵏ ⴷ ⵜⵣⵔⴰⵡⵉⵏ ⴷ ⵉⵔⵣⵣⵓⵜⵏ ⵜⵜⵓⴱⴷⴰⵔⵏⵉⵏ ⵖ ⵓⴼⵍⵍⴰ, ⵉ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵓⵜⴳ ⴰⴷ ⵜⵏ ⵜⵥⵕ.

   ·   ⴰⵙⴰⵜⵉ ⴰⵙⴰⵖⵓⵍ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ (ⵙ ⵜⴰⵄⵕⴰⴱⵜ).  

        ⴰⵎ ⵏⴰⵔ ⵏ ⵜⵖⵉⵎⵉⵜ ⵜⴰⵙⴳⵯⵙⴰⵏⵜ ⵏ ⵓⵎⴹⴰⴽⴰⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵓⵜⴳ ⵏⵏⵙⵏⵜ (ⵙ ⵜⴰⵄⵕⴰⴱⵜ).