ⵉⴷⵔⵓ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵜⵙⵓⵜⵍⵜ ⵜⵉⵙ 29 ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ

<p style="text-align: justify;">ⵔⴰⴷ ⵉⴷⵔⵓ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵙ ⵙⵉⵏ ⵉⵙⵇⵇⵉⵎ ⵏⵏⵙ, ⵜⵉⴽⴽⵍⵉⵜ ⵜⵉⵙ ⴽⵕⴰⴹⵜ, ⴳ ⵜⵙⵓⵜⵍⵜ ⵜⵉⵙ 29 ⵏ ⵓⵙⴼⵙⵔ ⴰⴳⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ, ⵍⵍⵉ ⵜⵙⵏⵎⴰⵍⴰ ⵜⵎⴰⵡⴰⵙⵜ ⵏ ⵉⵄⵔⵔⵉⵎⵏ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ, ⵙ ⵉⵡⵉⵣ ⴰⵎⴰⵜⵜⵓⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵜⵖⵔⵎⵜ ⵏ ⵕⵕⴱⵟ ⵙⴳ 9 ⴰⵔ 19 ⵎⴰⵢ 2024.</p>
<p style="text-align: justify;">ⵔⴰⴷ ⵉⴷⵔⵓ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵓⵎⵓⵙⵙⵓ ⴰⴷⵍⵙⴰⵏ ⵉⵙⵜⴰⵡⵀⵎⵎⴰⵏ ⴷⴷⵓ ⵜⵎⴰⵜⴰⵔⵜ: “60 ⵏ ⵓⵙⴳⴳⵯⴰⵙ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ”, ⵙ ⵓⵎⵙⴰⵙⴰ ⴷ ⵓⵙⴼⵓⴳⵍⵓ ⵏ ⵓⵙⴳⴳⵯⴰⵙ ⵡⵉⵙ 60 ⵏ ⵓⵙⴽⵔ ⵏ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴷ ⵓⵙⵙⵕⵚⵓ ⵏ ⵓⴱⵕⵍⴰⵎⴰⵏ ⵉⵏⵏⵓⵕⵥⵎⵏ ⴷ ⵓⵙⴽⵔ ⵏ ⵓⵏⵏⵓⵕⵥⵎ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴼ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵢⵉⵏ ⵙⵍⴰⵡⴰⵏ ⴰⴽⴽⵯ ⵉⵄⵔⵔⵉⵎⵏ ⴷ ⵜⵉⵏⵎⴰⵍ.</p>
<p style="text-align: justify;">ⵔⴰⴷ ⵢⵉⵍⵉ ⵓⵙⵎⵏⵉⴷ ⵏ ⴽⵉⴳⴰⵏ ⵏ ⵜⵡⵓⵍⴰⴼⵉⵏ ⴷ ⵉⴼⵉⴷⵢⵓⵜⵏ ⴷ ⵜⴻⵜⴳⴰⵔⵉⵏ ⵙⴰⵡⴰⵍⵏⵉⵏ ⴼ 60 ⵏ ⵓⵙⴳⴳⵯⴰⵙ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ, ⵙ ⵓⴹⴼⵕ ⵏ ⵜⵣⵣⵉⴳⵣⵜ ⵜⴰⵎⵔⵙⵍⴰⵏⵜ ⴷ ⵜⴷⵉⵎⵓⵇⵔⴰⵟⵉⵜ ⴷ ⵜⵏⴰⵎⵓⵏⵜ ⴳ ⵜⵎⴰⵣⵉⵔⵜ ⵏⵏⵖ, ⵙⴳ ⴰⵙⴽⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⴰⵎⵛⴰⵡⴰⵕ ⴳ 1956 ⵍⵍⵉ ⵉⴳⴰⵏ ⵜⴰⵔⵙⵍⵜ ⵜⴰⵎⵣⵡⴰⵔⵓⵜ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵙ ⵜⵙⵏⵜⴰⵢⵜ ⵏ ⵉⴳⵍⵍⵉⵏ ⵏ ⵓⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵙⵎⵎⵓⵙ, ⴷ ⵓⵙⵖⵣⵏ ⵏ ⵓⴷⵓⵙⵜⵓⵔ ⴰⵎⵣⵡⴰⵔⵓ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵙⴽⵔ ⵏ ⵉⵙⵜⴰⵢⵏ ⵍⵍⵉ ⴷ ⵉⵡⵉⵏⵉⵏ ⴰⴱⵕⵍⴰⵎⴰⵏ ⴰⵎⵣⵡⴰⵔⵓ ⵉⵙⵎⵓⵏⵏ ⵙⵉⵏ ⵉⵙⵇⵇⵉⵎⵏ ⴳ 1963 ⴳ ⵓⵣⵎⵣ ⵏ ⵉⴳⵍⵍⵉⵏ ⵏ ⵓⴳⵍⵍⵉⴷ ⵍⵃⴰⵙⴰⵏ ⵡⵉⵙ ⵙⵉⵏ, ⴷ ⵉⵎⵓⴽⵏⵏ ⵉⵎⴰⵜⴰⵢⵏ ⵜⵜⴰⵡⵙⴽⴰⵔⵏⵉⵏ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ.</p>
<p style="text-align: justify;">ⵔⴰⴷ ⵢⵉⵍⵉ ⵓⵎⵢⴰⵡⴰⵙ ⵊⴰⵔ ⵓⴱⵕⵍⴰⵎⴰⵏ ⴷ ⵜⵎⴰⵡⵙⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ, ⴳ ⵓⵙⵎⵏⵉⴷ ⵏ ⵓⵔⴰⵔⵏ ⵏ ⵜⵖⵉⵎⵉⵜⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⴷⵓⴷⴰⵏⵉⵏ ⵉ ⵚⴰⵃⴰ ⵏ ⵉⵏⵍⵎⴰⴷⵏ ⵏ ⵜⵉⵏⵎⴰⵍ ⵏ ⴽⵉⴳⴰⵏ ⵏ ⵜⵙⴳⴳⵉⵡⵉⵏ ⴷ ⵜⵎⵏⴰⴹⵉⵏ ⵏ ⵜⴳⵍⴷⵉⵜ. ⵜⵡⴰⵜⵜⵙ ⵜⵉⵍⴰⵍⵜ ⴰⴷ ⴰⴷⴰⵙ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵉ ⵉⵎⵥⵢⴰⵏⵏ ⴷ ⵓⵙⴷⵓⵙ ⵏ ⵡⴰⵜⵉⴳⵏ ⵏ ⵜⵏⵎⵓⵔⵉ ⴷ ⵜⴷⵉⵎⵓⵇⵔⴰⵟⵉⵜ, ⵔⴰⴷ ⵙⴽⵔⵏ ⵉⵎⴷⵔⴰⵡⵏ ⵜⵉⵍⴰⵍ ⵏ ⵉⵡⵔⵉⴽⵏ ⵍⵍⵉ ⴷⵔⵔⵓⵏⵉⵏ ⴳ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ ⵏ ⵓⴱⵕⵍⴰⵎⴰⵏ.</p>
<p style="text-align: justify;">ⵙ ⵖⵎⴽ ⴰⴷ, ⵔⴰⴷ ⵢⴰⵡⵙ ⵓⴱⵕⵍⴰⵎⴰⵏ ⴳ ⵓⵙⵎⵏⵉⴷ ⵏ ⵡⴰⵡⵍⴰⴼ ⵏ ⵜⵉⴷⵜ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴷ ⵓⵙⵉⵥⴹⵔ ⵏ ⵉⵏⵔⵣⴰⴼ ⵏ ⵓⵙⴼⵙⵔ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ, ⵍⵍⵉ ⵢⵉⵡⵉ ⴰⵅⵎⵎⴻⵎ ⵙⵉⵏ ⵉⵙⴳⴳⵯⴰⵙⵏ ⵣⵔⵉⵏⵉⵏ, ⵙ ⵓⵙⵙⵏ ⵏ ⵜⴻⵜⴳⴰⵔⵉⵏ ⵏ ⵓⴱⵕⵍⴰⵎⴰⵏ ⴷ ⵜⵥⵕⵉⴳⵉⵏ ⵏⵏⵙ ⴷ ⵉⵎⴰⵙⵙⵏ ⵏⵏⵙ ⵏ ⵓⵎⵢⴰⵡⴰⴹ ⴼ ⵜⵎⵣⵍⴰⵢⵉⵏ ⴷ ⵜⵙⵎⵉⴳⴰⵍ ⴷ ⵓⵚⴽⵓ ⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ.</p>